“Kaldalónsskálin” veitt í fyrsta sinn
Friðrik Guðmundsson, sem fyrstur hlaut Kaldalónsskálina, ásamt Guðmundi Snorrasyni, forseta Rótarýklúbbsins og Ólafi Egilssyni.
Ungur Seltirningur, Friðrik Guðmundsson, sem í vor lauk framhaldsnámi í píanóleik við Tónlistarskóla Seltjarnarness, hlaut á þjóðhátíðardaginn 17. júní Kaldalónsskálina.
Skálin er tón-listarviðurkenningu Rótarýklúbbs Seltjarnarness í minningu Selmu Kaldalóns tónskálds (1919-1984). Viðurkenningin var veitt í fyrsta skipti við athöfn í lok þjóðhátíðarguðþjónustunnar í Seltjarnar-neskirkju. Guðmundur Snorrason, forseti Rótarýklúbbsins, afhenti skálina, ásamt heiðursskjali. Þá lék Friðrik á píanó fallegt verk eftir sjálfan sig sem hann nefnir “Skammdegi” og tekur um fimm mínútur í flutningi. Var því afar vel tekið af viðstöddum. Kaldalónsskálin er fallegur farandgripur sérstaklega smíðuð í þessum tilgangi af Ásgeiri Reynissyni gull- og silfursmið, og er stefnt að því að hún verði framvegis veitt árlega fyrir framúrskarandi árangur í tónlistarnámi. Er þessi viðurkenning til marks um aukið starf Rótarýhreyfingarinnar til uppörvunar og stuðnings við ungu kynslóðina.
Hóf tónsmíðar fyrir um þremur árum
Friðrik hóf ungur að árum píanónám í Tónlistarskóla Seltjarnarness undir handleiðslu Aðalheiðar Eggertsdóttur píanókennara og lauk þar framhaldsnámi nýverið með lofsamlegum vitnisburði. Síðastliðið ár hefur hann einnig verið í tón-smíðanámi í Listaháskóla Íslands, en tvö til þrjú ár eru síðan hann hóf að semja tónverk m.a. fyrir Stúdentaleikhúsið í sýningarnar “Stundarfrið” og ” Mig”. Þá hefur verk eftir Friðrik, “Áráttuhegðun”, verið leikið á tónleikum í Listaháskólanum. Auk tónlistarnámsins varð Friðrik stúdent frá Menntaskólanum í Reykjavík árið 2013.
Friðrik Guðmundsson, ásamt afkomendum Selmu Kaldalóns og fleirum.
Stjarna Friðriks reis stöðugt
Ummæli Kára Húnfjörð Einarssonar, skólastjóra Tónlistarskóla Seltjarnarness, um Friðrik eru afar lofsamleg. Hann segir stjörnu hans í skólanum hafa risið stöðugt fram til námslokanna, þegar hann standi fremstur meðal jafningja. Síðustu tvö til þrjú árin hafi Friðrik lagt nótt við dag til að undirbúa lokapróf sitt; alla daga, allar helgar, alla frídaga hafi hann komið í skólann til æfinga. Eljan, seiglan og viljinn hafi drifið hann áfram, og við það hafi hann fengið dyggan stuðning kennara síns. – Á framhaldsprófstónleikum Friðriks í sal skólans nýlega léku tveir efnilegir skólafélagar hans, Bergur Þórisson básúnuleikari og Björgvin Hjálmarsson saxófónleikari, með honum verk eftir Friðrik, sem ber heitið “Getum við ekki bara…” og er í þremur köflum. Voru undirtektir hinar ágætustu.
Eiginmaður Selmu og stofnandi Rótarý á Nesinu
Kaldalónsskálin er, eins og fyrr segir, helguð minningu Selmu Kaldalóns tónskálds sem bjó og starfaði á Seltjarnarnesi um árabil. Gefin hafa verið út eftir hana 27 sönglög og hljómplata með lögum eftir hana og föður hennar Sigvalda Kaldalóns í flutningi kunnra listamanna. Selma var eiginkona Jóns læknis og varabæjarfulltrúa Gunnlaugssonar, forgöngumanns um stofnun Rótarýklúbbs Seltjarnarness og fyrsta forseta hans árið 1971; hann var síðar einnig umdæmisstjóri hreyfingarinnar.
