Útivistarsvæði á Austurheiðum

Fram undan eru framkvæmdir sem gera Austurheiðar borgar­inn­ar að betra og eftirsóknarverðara úti­vistarsvæði. Gönguleiðir verða merktar, stígar bættir og þeim fjölg­að og gerð leik- og dvalar­­svæði fyrir fólk og dýr. Fram­kvæmdir við fyrsta áfanga hefjast nú í sumar og er áætlaður kostnað­ur 100 milljónir króna. Útivistar­svæðið Austurheiðar er alls um 930 hektara svæði sem nær yfir Austurheiðarnar að mestu, Hólmsheiði, Grafarheiði og Reynisvatnsheiði. Innan svæðisins er Rauðavatn, Reynisvatn og Langavatn að hluta.

Verkefnið er byggt á sam­þykktu rammaskipulagi fyrir Austur­heiðar sem samþykkt var af skipulags- og samgönguráði 10. mars 2021. Þá eru Austurheiðar hluti af Græna treflinum sem er samheiti yfir skógrækt­ar- og útivistarsvæði á útmörkum sveitarfélaganna sjö á höfuðborgarsvæðinu. Markmiðin með gerð rammaskipulags fyrir Austurheiðar eru margþætt og eiga að tryggja samræmingu landnotkunar innan svæðisins til að forðast hagsmuna­árekstra milli núverandi og framtíðar landnotkunar á svæðinu. Helstu markmið eru að skapa fjölbreytt og aðgengilegt útivistarsvæði fyrir alla aldurshópa og ólíka notenda­hópa eins og fyrir hestafólk, gönguskíði, fjallahjól, torfæruhjól, göngu, skokk, sveppamó, berjamó, ferðaþjónustu og fisflug. Markmið skipulagsins er að styrkja samspil og tengingu Austurleiða við aðliggjandi útivistarsvæði.