Verður gist í Naustinu?

Skipulags- og samgönguráð Reykjavíkur hefur samþykkt að auglýst verði breyting á deiliskipulagi Naustareits vegna lóðarinnar nr. 6 til 10A við Vesturgötu. Í breytingunni felst að heimilt er að koma fyrir svölum á austurenda Vesturgötu 6 til 8 og endurbyggja svalir með tröppum á Vesturgötu 10. 

Fyrir liggja uppdrættir THG Arkitekta ehf. að þessum breytingum. Jafnframt verður gististarfsemi heimiluð á 2. hæð Vesturgötu 6 til 8. Málinu var jafnframt vísað áfram til borgarráðs.Vesturgata 6 til 8 er sögufrægt hús. Þar var lengst af starfrækt veitingahúsið Naust. Engin starfsemi hefur verið í húsinu nokkur undanfarin ár. Eigandi þess er Kirkjhvoll sf., félag Karls Steingrímssonar, sem jafnan er kenndur við Pelsinn.