Þurfum öflugri talsmenn sveitarfélaga inn á Alþingi

Fjölskyldan. Guðmundur Ari, með Magneu í fanginu. Þá Árni Bergur, Kjartan Kári og Nanna.

Guðmundur Ari Sigurjónsson er tómstunda- og félagsmálafræðingur og bæjarfulltrúi fyrir Samfylkinguna á Seltjarnarnesi. Guðmundur hefur starfað í æskulýðsgeiranum um árabil. Hann sinnti einnig íþróttum á yngri árum. Spilaði handbolta og fótbolta með Gróttu. Guðmundur Ari er giftur Nönnu Kaaber Árnadóttur íþróttafræðing og saman eiga þau börnin Árna Berg sem er fæddur 2013, Kjartan Kára sem er 2016 og Magneu sem fædd er 2018.

„Ég er fæddur og uppalinn á Seltjarnarnesi. Ég flutti af Nesinu þegar ég fór að heiman en eftir að ég byrjaði með konunni minni og við fórum að hugsa um að eignast börn fór okkur báðum að langa að flytja aftur heim á Nesið. Það eru mikil forréttindi að alast upp á Nesinu enda eins konar sveit í borg. Hér er einn leikskóli, einn grunnskóli og eitt íþróttafélag svo allir kannast við flesta. Það var góður skóli að æfa íþróttir með Gróttu á sínum tíma þar sem við vorum kannski ekki besta lið landsins en við hirtum þó nokkra prúðasta liðið bikara. Á Nesinu erum við líka með sterka tengingu við sjóinn, fjöruna og náttúruna á Vestursvæðunum. Það skemmir svo ekki fyrir að þrátt fyrir þessi sveitalífsgæði þá erum við nær miðbæ höfuðborgarinnar en mörg hverfi Reykjavíkur.“

Fékk nýja nálgun á lífið fyrir austan

Þrátt fyrir að hafa verið ánægður með að alast upp á Nesinu segir Guðmundur Ari frá því að hann hafi gengið nokkuð utan leiðar í skólakerfinu. „Ég passaði ekki alveg inn í skólakerfið frá því að ég var svona 10 ára. Átti erfitt með að sitja kyrr og hlýða í blindni því sem kennarinn vildi að ég gerði. Þegar árin liðu endaði ég í raun skólagönguna á Nesinu í eiginlegri uppreisn við skólann. Þetta varð til þess að þegar ég byrjaði að vinna í Selinu nokkrum árum seinna héldu gamlir kennarar að ég væri mættur í 12 spora kerfið og væri að bæta fyrir gamlar syndir. Eftir grunnskólagönguna fór ég í FÁ og fann mig ekki heldur þar. Áherslan var aðallega á félagslífið og tómstundir. Sumarið eftir þetta fyrsta ár ákvað ég að breyta algjörlega til og flytja austur á Eskifjörð þar sem ég vann við að leggja hitaveitu í sveitarfélaginu. Á Eskifirði eignaðist ég kærustu og marga góða vini svo ég var þar áfram einn vetur í Verkmenntaskóla Austurlands. Það var alveg dásamlegt að búa á Eskifirði og þar rann upp fyrir manni hversu mikil lífsgæði eru fólgin í því að búa í þéttu samfélagi og hversu margt er líkt með samfélaginu á Seltjarnarnesi og samfélögum á landsbyggðinni. Lífið fyrir austan var að mörgu leyti öðruvísi en í borginni, maður vann 12 tíma á dag og svo voru sveitaböll um helgar. Eftir að ég kom suður á ný fór ég fyrst í Iðnskólann í Reykjavík og þaðan lá leiðin í Fjölbrautaskólann í Breiðholti.   

Lærði margt hjá Möggu

Guðmundur Ari byrjaði að vinna í félagsmiðstöðinni Selinu á Seltjarnarnesi þegar hann var 19 ára. „Ég vil meina að ýmislegt hafi snúist við hjá mér þegar ég byrjaði að vinnu í Selinu hér á Seltjarnarnesi. Í ungmennastarfinu fann ég mína köllun ef svo má segja. Eftir að ég byrjaði að vinna að þessum málum sótti ég um undanþágu til að innritast í nám í tómstunda- og félagsmálafræði við Háskóla Íslands. Ég varð að fara þá leið því ég hafði ekki lokið stúdentsprófi endanlega þótt ég væri komin með nægilega margar einingar. Það var í tómstundafræðinni sem mér leið í fyrsta sinn vel í skólanum. Annars held að Margrét Sigurðardóttir eða Magga í Selinu eins og við kölluðum hana alltaf hér á Nesinu hafi verið einn besti kennari minn og hvatti hún mig áfram í námi og starfi. Magga byggði upp faglegt æskulýðsstarf af krafti og árangurinn lét ekki standa á sér. Fyrir síðustu aldamót voru unglingar á Seltjarnarnesi Íslandsmeistarar í unglingadrykkju samkvæmt könnunum Rannsóknar og greiningar. Magga byrjaði að vinna í Selinu á þessum tíma og hún byggði upp gríðarlega öflugt samstarf við skólann, Gróttu og foreldrafélagið þar sem tekið var höndum saman við að auka framboð af jákvæðum tómstundum, auka aðhald og minnka drykkju. Þessi þróun leiddi að reykingar og drykkja hvarf nánast í Grunnskóla Seltjarnarness, þátttaka í jákvæðum tómstundum jókst sem birtist í aukinni þátttöku í starfinu á Nesinu en einnig í fjölda krakka á Nesinu sem tóku að sér leiðtogahlutverk í félagslífi framhaldsskólanna. Það var ótrúlega gefandi að vinna í Selinu undir forystu Möggu þar sem markvisst var unnið að því að bjóða upp á framúrskarandi félagsmiðstöðvastarf, námskeið, viðburði og ferðalög. Áherslan var alltaf á valdeflingu, að virkja unga fólkið til þátttöku, skapa öflugt nemenda- og ungmennaráð þar sem þau fengu sjálf að skapa og stýra eigin félagsstarfi með stuðningi okkar starfsfólksins.“

Hef áhyggjur af ungmennastarfinu

Guðmundur Ari segir verulega ástæðu til þess að hafa áhyggjur af ungmennastarfinu á Nesinu eftir að starfsemi Selsins var skorin niður um 40% en niðurskurður í Selinu varð til þess að Magga í Selinu sagði upp störfum og enginn hefur verið ráðinn í hennar stað. „Þessi niðurskurður er sorgarsaga um pólitíska skammsýni og því miður er að sækja í sama farið. Ungmennadrykkja er farin að aukast sem er afar slæmt. Í Covid faraldrinum hefur félagsleg einangrun aukist – ekki síst á meðal ungmenna. Sveitarfélögin í kringum okkur ásamt ríkinu eru meðvituð um þessa stöðu og eru að leggja aukna áherslu á að auka framboð á faglegu tómstundastarfi sem miða að því að virkja ungt fólk til þátttöku. Þetta ættum við að gera líka og vonast ég til að bæjarstjórn snúi þessum niðurskurði við svo að börnin okkar fái tækifæri til að alast upp í sama öfluga og skapandi félagsstarfi eins og við sem eldri erum fengum að kynnast.

Úr ungmennastarfi á Seltjarnarnesi.

Hóf sinn pólitíska feril í Sjálfstæðisflokknum

Þegar Guðmundur Ari starfaði sem forstöðumaður í Selinu hélt hann utan um valáfanga í Valhúsaskóla sem heitir félagsmálafræði. Eftir að hafa haldið fyrirlestur um mikilvægi þess að krakkarnir taki virkan þátt í nefndum og félagslífi skólans fann hann að hann þyrfti að vera virkur þátttakandi sjálfur. „Þegar ég labbaði úr þessari kennslustund hugsaði ég hversu mikill hræsnari ég væri þar sem ég var sjálfur ekki virkur í neinum ákvörðunum í mínu nærumhverfi. Ég ákvað því að mæta á fund hjá Sjálfstæðisfélaginu á Seltjarnarnesi þar sem ég var ekki búinn að móta pólitískar skoðanir mínar og Sjálfstæðismenn voru við völd svo ég hugsaði að þar væri hægt að hafa áhrif. Það þurfti svo reyndar bara einn fund þar sem fjallað var um skóla- og tómstundastarfið á Nesinu að ég gerði mér grein fyrir því að mín sýn um öflugt menntakerfi rúmaðist ekki á fundinum þar sem megininntak í umræðunum var um hvernig mætti skera niður þjónustuna.“ Eftir þetta stutta stopp hjá Sjálfstæðismönnum mætti Guðmundur Ari á fundi hjá Samfylkingunni, þar var honum stillt upp í annað sæti á lista flokksins í sveitarstjórnarkosningunum 2014 sem skilaði sæti í bæjarstjórn Seltjarnarness. „Það var ótrúlega skemmtileg upplifun að taka þátt í kosningum í fyrsta skipti árið 2014. Í Samfylkingunni var ótrúlega samheldinn og skemmtilegur hópur sem Margrét Lind Ólafsdóttir leiddi. Það var mjög lærdómsríkt að sitja með Margréti Lind í bæjarstjórn enda var hún mjög öflugur sveitarstjórnarmaður og er hún hin Maggan sem kenndi mér svo margt, studdi vel við bakið á mér og hvatti mig áfram.“ Í sveitarstjórnarkosningunum 2018 leiddi Guðmundur Ari lista Samfylkingarinnar og fékk framboðið aftur tvö menn kjörna í bæjarstjórn.“

Innkoma í landsmálin

Guðmundur Ari hefur einnig haft afskipti af landsmálum. Hann er nú í fjórða sæti á framboðslista Samfylkingarnar í Suðvestur kjördæmi eða kraganum eins og það er oft kallað. „Ég er mjög spenntur fyrir kosningunum framundan og vonast ég eftir að fá góðan stuðning svo að ég fái tækifæri til þess að stíga inn á Alþingi sem varaþingmaður til að berjast fyrir málefnum ungs fólks, umbótum í menntamálum ásamt stórum skrefum í umhverfis- og heilbrigðismálum. Maður hefur rekið sig á það í bæjarstjórninni og ekki síður í stjórn Sambands íslenskra sveitarfélaga að það þarf öflugri talsmenn sveitarfélaga inn á Alþingi. Á Alþingi er sífellt verið að setja lög sem auka kröfur á sveitarfélög um kostnaðarsama þjónustu án þess að fjármagn fylgi. Þetta verður til þess að svigrúm sveitarfélaga til þess að veita íbúum sínum öfluga þjónustu minnkar sem verður til þess að fleiri íbúar falla á milli kerfa sem endar svo sem stór kostnaðarliður á ríki og sveitarfélög í framtíðinni.“ 

You may also like...